நான் ஒரு முட்டாளுங்க!- 7

என்னுடைய ஸ்விவ்ஃட்டு காருமேல எனக்கு கொள்ள பிரியம். விஷம் மாதிரி பெற்றோல் விலை ஏறுதே.. அதுதான் பிடிக்கலேங்க. காருக்கு காஸ் டாங்க் போட்டுட்டேன். காஸ் நல்லது தானே! சுலபமா கிடைக்கிது, சுத்தமானது, மாசு கிடையாது, சிக்கனமானது, சட்டத்துற்கு உட்பட்டது ஆகவே புத்திசாலித்தனமா செஞ்சுட்டேன். என்னைவிட “புத்திசாலி” என்னுடைய நண்பர். அடுப்பெரிக்கன்னு அளந்து அளந்து அரசாங்கம் கொடுக்கிற சிலின்டர் காஸ்ஸை காருலே போட்டுக்கிறாரு! 40 ரூபா கொடுத்தா வீடு தேடிவந்து திருட்டுத்தனமா உங்க வீட்டு காஸ்ஸை உங்க கார்லே ஏத்திவிட எங்க ஊரிலே ஒரு கூட்டமே இருக்குதாம். (இந்த திருட்டு வேலை யார் கண்ணிலேயும் படாம இருக்க வீட்டு வாசல்லே காவல் காக்க வேண்டியது வீட்டுக்காரர் பொருப்பு.) இப்படி காவல் காக்கிற நண்பர் ஒரு நாள் என் கண்ணிலே பட்டுட்டார். அசடு வழிய எனக்கு ஆலோசனையும் சொன்னார், “ஹி...ஹி... உங்க வீட்டிலே இரண்டு பேருக்குதானே சமையல்! மிஞ்சிர சிலிண்டரை கார்லே போட்டு ஓட்டுங்க, சார். இது ரொம்ப சிக்கணம். மைலேஜும் நல்லா கிடைக்கும்.”ன்னார். “சிக்கணமா இருக்கலாம்ங்க; ஆனா சட்டவிரோதம்னு உங்ககுக்கே தெரியுமில்லே.”னு சொல்லிகிட்டே வீட்டுக்குள்ளே வந்தேன். என் மனைவி “அந்த ஆளுக்கு நல்லாவே குடுத்தீங்க. திருட்டு முட்டாளா இல்லாமே நஷ்டப்படுர முட்டாள இருந்திட்டு போரது உங்களுக்கு எவ்வளவோ மேல்” ன்னு என்ன பாராட்டினாங்க. பாராட்டுங்களா இது?! எப்படி பார்த்தாலும் எனக்கு முட்டாள் பட்டந்தான் போங்க.